Бишкек, 17.04.25. /Кабар/. Талас районунун Чоң-Алыш айыл аймагында мал союучу жаңы цех ачылды. Бул тууралуу Суу ресурстары, айыл чарба жана кайра иштетүү өнөр жай министрлигинен билдиришти.
Ачылыш аземине министрлер кабинетинин төрагасынын орун басары – айыл чарба министри Бакыт Төрөбаев катышты.
"Ар бир айыл аймагында заманбап мал союучу касапкана болушу керек. Себеби, санитардык-ветеринардык талаптар сакталып, азык-түлүк коопсуздугуна болгон жоопкерчилик жогорулап, элибиз таза эт менен камсыздалат. Бул улутубуздун саламаттыгы үчүн аба-суудай керек.
Ошондой эле жумуш орундары түзүлүп, өлкөбүздүн экономикасына салым болот. Союлган малдын териси жараксыз болбой, кайра иштетилип, элибизге кирише берет", –деди Төрөбаев.
Бул өндүрүштүк объектини курууга жеке инвестициялардын эсебинен 2 млн сом жумшалган. Ишканада жергиликтүү тургундар туруктуу жумуш менен камсыз болот.
