Бишкек, 28.07.25. /Кабар/. Таиланд менен Камбоджа ок атышууну токтотууга макулдашты. Бул тууралуу РИА Новости маалымдады.
Анда белгиленгендей, Таиланд менен Камбоджанын ок атышууну токтотуу келишими жергиликтүү убакыт боюнча түн жарымда күчүнө кирерин Малайзиянын премьер-министри Анвар Ибрагим эки өлкөнүн сүйлөшүүсүнүн жыйынтыгынан кийин билдирди.
"Камбоджа менен Таиланд төмөнкүдөй маселелер боюнча жалпы түшүнүшүүгө келишти: биринчиси — жергиликтүү убакыт боюнча бүгүн саат 24:00дө тез арада ок атышууну токтотуу. Бул тынчтыкты жана коопсуздукту калыбына келтирүүгө жасалган маанилүү кадам", — деди ал.
Белгилей кетсек, Таиланд менен Камбоджанын ортосундагы кырдаал чек арадагы талаштуу тилкеде 28-майда курчуп кеткен.
Бүгүн Таиланд менен Камбоджанын жогорку кызмат адамдары Малайзияда жолугушуу өткөрдү. Сүйлөшүү 24-июлда эки өлкөнүн чек арасында орун алган аскердик кагылышуудан кийин уюштурулду.
