Бишкек, 14.03.25. /Кабар/. Сузак районунун Чокмор айылында аймактык оорукананын жаңы 75 орундуу төрөт бөлүмү жана 75 орундуу балдар ооруканасы курулууда. Бул тууралуу президенттин Жалал-Абад облусундагы өкүлчүлүгүнөн билдиришти.
Күн мурун президенттин өкүлү Тилек Текебаев төрөт үйү менен балдар ооруканасынын курулушунан кабар алды.
Аталган объекттин курулушу 2023-жылдын март айында башталган, жалпы 7 гектардан ашуун жер аянтын ээлейт. Азыркы учурда төрөт бөлүмүнүн курулушу аяктап, медициналык жабдыктар алынып келинген. Ал эми балдар ооруканасынын курулушу 90 пайызга бүткөрүлгөн.
Жумуштар Өзгөчө кырдаалдар министрлигинин “Жалал-Абад көчмө механикалаштырылган отряды” тарабынан аткарылууда. Долбоордун жалпы баасы 570 млн сомду түзүп, демөөрчүлөр тарабынан каржыланууда.
