Бишкек 24.06.25 /Кабар/. Ат-Башы айылында ишкер айым Дамира Турдалиева "Социалдык келишим" долбоорунун жардамы менен үч багытта ишкердик жүргүзүп, жылына миллион сомдон ашык киреше табууда.
Президенттин аймактагы өкүлчүлүгүнөн билдиришкендей, ал 2022-жылы мамлекеттен алган 100 миң сом кайтарымсыз каражат менен наабайкана ачкан. Кийин пайызсыз 200 миң сом насыя алып, ашкана жана эс алуу жайын ишке киргизген.
Эмгек, социалдык камсыздоо жана миграция министри Равшанбек Сабиров, облус жетекчисинин орун басары Шабдан Абдырайым уулу жана Ат-Башы районунун акими Эмилбек Абдыкадыров ишкер айым менен жеринде жолугушуп, анын ийгилигин жогору баалашты.
Бүгүнкү күндө анын наабайканасы, "Манты" кафеси жана "Ынтымак" эс алуу жайында 10 адам туруктуу жумуш менен камсыз болгон. Дамира айым мурда жөлөк пул алып келген болсо, азыр өз күчү менен турмушун өзгөрткөн аракетчил ишкер айымга айланды.
Бул ийгилик — мамлекет тарабынан көрсөтүлгөн колдоонун туура колдонулушунун жандуу мисалы.
Белгилей кетсек, 2025-жылы Нарын облусу боюнча жалпы 709 үй-бүлө социалдык келишим долбоорунун алкагында колдоо алып, өз алдынча киреше табууга кадам ташташты.
