Бишкек, 12.12.25 /Кабар/. Баткен облусунун Сүлүктү шаарында аскер кызматкерлерине арналган кызматтык батирлер расмий түрдө пайдаланууга берилди. Анын ачылыш аземине министрлер кабинетинин төрагасынын орун басары – УКМК төрагасы Камчыбек Ташиев катышканын, Region телеканалы билдирди.
Анда белгиленгендей, Сүлүктү шаарындагы 2051 аскер бөлүгүнүн аймагында жайгашкан, мурда кароосуз калган төрт кабаттуу имарат республикалык бюджеттин эсебинен толук капиталдык оңдоп-түзөөдөн өткөрүлүп, 64 батирлүү заманбап кызматтык турак жайга айландырылды.
Оңдоо жана реконструкциялоо иштери үстүбүздөгү жылдын март айында башталып, октябрь айында толугу менен аяктаган. Алар бардык санитардык-техникалык жана социалдык талаптарга жооп берген шарттар менен жабдылды.
