Бишкек, 16.06.26 /Кабар/. Швеция атомдук энергетиканы өнүктүрүү багытында ири кадам жасап, Рингхальс атомдук электр станциясынын аймагында үч жаңы өзөктүк реактор курууну пландап жатат. Бул тууралуу Казинформ билдирет.
Маалыматка ылайык, долбоордун жалпы кубаттуулугу 1410 мегаватты түзөт.
Реактордук технологияларды жеткирүүчү катары Британиянын “Роллс-Ройс СМР” компаниясы тандалды. Долбоор энергетикалык “Ваттенфаль” компаниясы жана “Индустрикрафт” консорциуму менен биргеликте ишке ашырылат. Швеция өкмөтү бул демилгеге 30 миллиард швед кронасынан ашык каражат бөлүүнү көздөп жатат.
Ар бир реактордун кубаттуулугу 470 мегаватт болуп, үч блок жылына болжол менен 12 тераватт-саат электр энергиясын өндүрөт. Бул өлкөдөгү азыркы электр энергиясынын өндүрүшүнүн 7,5 пайызын камсыздай алат.
Адистердин айтымында, мында британиянын сунушу инвестициялык жана эксплуатациялык чыгымдардын төмөндүгү, ошондой эле курулуш тобокелдиктеринин аздыгы менен айырмаланган.
Учурда долбоор боюнча акыркы инвестициялык чечим кабыл алына элек. Биринчи энергоблок 2030-жылдардын ортосунда ишке берилери күтүлүүдө, ал эми бардык үч реактор толук кандуу 2040-жылдардын башында иштей баштайт.
Швеция өзүнүн энергетикалык стратегиясынын алкагында 2035-жылга чейин кеминде 2500 мегаватт жаңы өзөктүк кубаттуулуктарды ишке киргизүүнү максат кылууда.
