Бишкек, 06.07.26. /Кабар/. Кыргызстанга Тажикстандын 15 кишиден турган жаш окумуштуулар делегациясы келди.
Агартуу министрлигинен билдиришкендей, алар Шанхай кызматташтык уюмуна (ШКУ) мүчө өлкөлөрдүн жаш окумуштуулары үчүн уюштурулуп жаткан эл аралык илимий-билим берүү лагерине катышууат.
Конокторду "Манас" эл аралык аэропортунан министрликтин Мектептик билим берүү башкармалыгынын башчысы Мелисбек Музулманов тосуп алды.
"Бул эл аралык лагерь Кыргызстандын ШКУга төрагалыгынын алкагында өтүүдө. Программанын алкагында катышуучулар илимий сессияларга, топтук талкууларга, тимбилдингдерге жана практикалык воркшопторго катышып, командалык багытта иш алып барышат", - деп айтылат маалыматта.
Иш-чара ШКУга мүчө өлкөлөрдүн жаш окумуштуулары менен мектеп окуучуларынын ортосунда тажрыйба алмашууну, илимий кызматташтыкты чыңдоону жана жаңы биргелешкен демилгелерди ишке ашырууну көздөйт.
