Бишкек, 13.07.26. /Кабар/. Жалал-Абад облусундагы "Саймалуу-Таш" мамлекеттик жаратылыш паркынын Көк-Арт өрөөнүндө туристтердин коопсуздугун камсыздоо максатында жаңы көпүрө курулуп, пайдаланууга берилди.
Мамлекеттик жаратылыш паркынан билдиришкендей, көп жылдан бери көйгөй жаратып келген петроглифтерге алып баруучу көпүрө "Саймалуу-Таш" мамлекеттик жаратылыш паркы тарабынан жаңыланды.
Көпүрөнүн ачылыш аземине райондук мамлекеттик администрациянын башчысы – аким Н. Эшмукамбет уулу катышты.
Ал жаңы көпүрө туристтер үчүн коопсуз жана ыңгайлуу шарттарды түзүү менен бирге аймактагы туризмди өнүктүрүүгө жана тарыхый-маданий мурастарды сактоого өбөлгө болорун белгиледи.
Райондук мамлекеттик администрация бул долбоордун ишке ашуусуна салым кошкон "Саймалуу-Таш" мамлекеттик жаратылыш паркынын эмгек жамаатына жана демөөрчүлөргө ыраазычылык билдирди.
