Бишкек, 29.01.25. /Акназик Тургунбаева - Кабар/. Түштүк Кореянын Пусан эл аралык аэропортунда учак өрттөнүп, 170тен ашуун жүргүнчүлөр жана экипаж мүчөлөрү эвакуацияланды. Бул тууралуу “Йонхап” маалымат агенттиги жазды.
Агенттик билдиргендей, өрт күн мурун кечинде Гонконгго уча турган Air Busan авиалайнеринин бортунан чыккан. Өрт учактын куйругунан башталып, андан соң өрт фюзеляжга өткөн.
Өрт учурунда лайнердин бортунда 169 жүргүнчү жана жети экипаж мүчөсү болгон. Алардын бардыгы үйлөмө тепкич аркылуу тез арада эвакуацияланган. Окуянын кесепетинен жабыркагандар болгон жок.
Учурда өрттүн келип чыгуу себептери такталууда.
