Бишкек, 18.08.2025. /Кабар/. Бүгүн Ош шаарында "Алтын Казык – доор өзгөрткөн билим" август педагогикалык форуму өз ишин баштады. Иш-чара Агартуу министрлиги тарабынан уюштурган.
Билим берүү тармагындагы жылдын эң башкы окуясы 400дөн ашуун катышуучунун: мугалимдер менен мектеп директорлорунун, бала бакчалар менен кесиптик лицейлердин кызматкерлеринин, жогорку окуу жайлардын, мамлекеттик органдардын жана эл аралык уюмдардын өкүлдөрүнүн башын бириктирди.
Ведомстводон маалымдашкандай, коноктордун арасында президенттин администрациясынын өкүлдөрү, президенттин облустардагы өкүлдөрү жана алардын орун басарлары, ошондой эле Азия өнүктүрүү банкы, ЮНИСЕФ, Дүйнөлүк банк, Европа Биримдиги, Ага Хан фондунун жана БУУнун өкүлдөрү бар.
Форумдун максаты – “Алтын Казык” программасын ишке ашыруунун алкагында билим берүүнү трансформациялоонун артыкчылыктарын жана натыйжалуу механизмдерин талкуулоо.
Форум президент Садыр Жапаровдун видео кайрылуусун көрсөтүү менен салтанаттуу түрдө ачылды. Мамлекет башчысы реформалардын стратегиялык маанисин жана мугалимдердин келечек муунду даярдоодогу өзгөчө ролун белгиледи.
Алгач агартуу министри Догдуркүл Кендирбаева сөз сүйлөп, андан кийин президенттин администрациясынын жетекчисинин орун басары Азамат Кадыралиев катышуучуларга кайрылуу жасады.
Ал мамлекет билим берүү системасын өнүктүрүүгө, бул тармакка инвестицияларды көбөйтүүгө, заманбап мектептерди жана бала бакчаларды курууга, ошондой эле педагогдорду колдоо боюнча чараларга көңүл буруп жатканын баса белгиледи. Реформанын негизги кадамдары катары 12 жылдык окутууга өтүүгө, STEM багыттарын киргизүүгө жана мектепке чейинки билим берүү менен камтууну кеңейтүүгө өзгөчө басым жасалды.
