Бишкек, 16.09.26. /Кабар/. Ош шаарында жаңы сейил бак пайдаланууга берилди.
Мэриядан билдиришкендей, аталган сейил бак демөөрчүлөр тарабынан курулду.
Жаңы эс алуу жайы шахмат сүйүүчүлөрүнүн сүйүктүү жайына айланат. Анткени аймакта шахмат такталары орнотулган. Ошондой эле балдар аянтчасы, эс алуучу орундуктар жайгашты. Айланасы толугу менен жашылдандырылып, газон себилип, гүлдөр отургузулган.
Парктын коопсуздугуна өзгөчө көңүл бурулуп, айлана-чөйрө толугу менен видеокөзөмөл системасы менен камсыздалган. Мындан ары жарандар бул жерде күнү-түнү коопсуз эс ала алышат.
Шаар башчысы Жанарбек Акаев акыркы алты ай ичинде Ош шаарында 30 сейил бак ачылганын, бул көрсөткүч дагы көбөйө берерин белгиледи.
