Бишкек, 03.11.25. /Кабар/. Бүгүн Кытадын Ганьсу провинциясынан делегациясы иш сапары менен Ош облусуна келип, эки тараптуу жолугушуулар өттү. Бул тууралуу президенттин аймактагы өкүлчүлүгүнөн билдиришти.
Иш-чарага президенттин Ош облусундагы өкүлүнүн орун басары Илияз Ташбаев жана Ганьсу провинциясынын Элдик саясий кеңешинин төрагасынын орун басары Хо Вэйпин жетектеген делегация катышты.
Жолугушуу боордоштук жана кызматташтык мамилелеринин алкагында уюштурулуп, анда бир катар маанилүү маселелер талкууланды. Тараптар Ош облусу менен Ганьсу провинциясынын ортосундагы кызматташтыкты мындан ары бекемдөө, соода-экономикалык жана маданий-гуманитардык байланыштарды кеңейтүү боюнча пикир алышты.
Өз сөзүндө Илияз Ташбаев эки аймактын ортосундагы боордоштук мамилелер 2013-жылы түзүлгөнүн белгилеп, ушул жылдар аралыгында билим берүү, саламаттыкты сактоо жана гуманитардык жааттарда жигердүү иш алып барылганын баса белгиледи. Ошондой эле COVID-19 пандемиясы учурунда Ганьсу провинциясы көрсөткөн гуманитардык жардам үчүн ыраазычылык билдирди.
Тараптар Кытай – Кыргызстан – Өзбекстан темир жолу долбоору, логистикалык борборлорду түзүү, айыл чарба жана кайра иштетүү өнөр жайы, туризм, билим берүү жана маданий алмашуу багыттарында кызматташууну кеңейтүү маселелерин талкуулашты. Ошондой эле Ош облусунда кытай капиталы катышкан ишканалардын ишмердүүлүгү жана жаңы инвестициялык долбоорлор каралды.
Жолугушуунун жыйынтыгында тараптар кызматташтыкты жаңы деңгээлге чыгаруу максатында соода, инвестиция, туризм, айыл чарба жана билим берүү тармактарын камтыган "Жол картасын" иштеп чыгуу боюнча макулдашты.
Иш-чара достук жана өз ара түшүнүшүү маанайында өтүп, эки тарап тең боордоштук мамилелерди мындан ары чыңдоого даяр экенин билдиришти.
