Бишкек, 16.05.25. /Кабар/. 2028-жылкы Олимпиада учурунда Лос-Анжелесте көрүүчүлөр үчүн аба таксисин ишке киргизүү пландаштырылууда. Бул тууралуу Казинформ жазды.
Маалыматка караганда, шаардагы үчүнчү жайкы Олимпиада оюндарына жооптуу LA28 уюштуруу комитети Олимпиада жана Паралимпиадалык оюндар учурунда аба такси кызматтарын көрсөтүү үчүн Archer Aviation менен өнөктөштүктө иш алып барат.
Компания өзүнүн учактар паркын күйөрмандарды спорт аянтчаларына жеткирүү жана кайра алып келүү үчүн колдонууну пландап жатканын билдирген.
“Биз адамдардын шаарда жүрүү жолун өзгөрткүбүз келет жана Америкадагы транспорттун келечегин аныктай турган тарых жараткыбыз келет. Бул үчүн Олимпиада оюндарынан башка ыңгайлуу убакыт жок”, - деди Адам Голдштейн, Archer Aviation компаниясынын башкы директору жана негиздөөчүсү.
Агенттик белгилегендей, абада жүргөн такси идеясы тармакта көптөн бери талкууланып келет. Аларды учуруу 2024-жылкы Париж Олимпиадасына пландаштырылган, бирок учак Европанын авиациялык коопсуздук агенттигинен керектүү сертификат алган эмес.
Ушундай эле жагдай Америка Кошмо Штаттарында өнүгүп жатат. Archer Aviation азырынча Федералдык авиация администрациясы (FAA) тарабынан тастыктала элек, бул анын учактары коммерциялык колдонууга азырынча даяр эмес дегенди билдирет.
Эгер компания 2028-жылкы оюндарга өз убагында сертификат алса, аба таксилери шаар тургундарына жана конокторуна 10-20 мүнөттүк каттамдарды сунуштап, негизги пункттарды, анын ичинде аймактын негизги олимпиадалык ареналарын бириктире алат.
Азырынча мындай сапардын баасы канча экени белгисиз, бирок кардарлар мобилдик тиркеме аркылуу авиа таксиге буйрутма берери белгилүү болду.
Эске салсак, Лос-Анжелестеги Олимпиада 2028-жылдын 14-июлунда ачылыш аземи менен башталып, 30-июлга чейин уланат.
