Бишкек, 17.07.26. /Кабар/. Ноокен районунун Кочкор-Ата шаарында жана Момбеков айыл аймагында селдин кесепетинен инфратүзүмгө жана турак жайларга келтирилген чыгымдарды тактоо башталды.
Өзгөчө кырдаалдар министрлигинин Жалал-Абад облустук башкармалыгынан билдиришкендей, министрлер кабинетинин токтомуна ылайык 4 жумушчу топ түзүлдү. Алар жеринде изилдөө жүргүзүп, келтирилген зыяндын көлөмүн аныктоо жана тиешелүү актыларды түзүү боюнча иш алып барууда.
"Учурда жалпы 788 кызматкер, 70 атайын техника жана 8 мотопомпа тартылып, турак жайларды, короо-жайларды жана көчөлөрдү ылай-кумдан тазалоо, сел калдыктарын чыгаруу иштери үзгүлтүксүз жүргүзүлүүдө", - деп айтылат маалыматта.
ӨКМ табигый кырсыктын кесепеттерин кыска мөөнөттө жоюу жана жабыркаган тургундарга зарыл жардамдарды көрсөтүү үчүн бардык мүмкүнчүлүктөр жумшалып жатканын кабарлады.
