Бишкек, 20.06.25./Кабар/. Ноокат районунун Каранай айылына 225 орундуу мектептин пайдубалына капсула салынды. Бул тууралуу Жогорку Кеңештен билдиришти.
Иш-чарага Жогорку Кеңештин төрагасы Нурланбек Тургунбек уулу, депутаттар Надира Нарматова, Нилуфар Алимжанова, Советбек Рустамбек уулу, Равшанбек Рысбаев, Сайпидин Зулпуев жана президенттин Ош облусундагы өкүлү Элчибек Жантаев катышты.
Аземдин алкагында жергиликтүү эл менен да баарлашкан Төрага өлкөдө жүргүзүлүп жаткан реформалар, ишке ашырылып жаткан долбоорлор тууралуу кеңири кеп кылды.
“Акыркы төрт жыл аралыгында миңдеген чакырым жолдор салынып, жүздөгөн билим берүү жайлары жана саламаттыкты сактоо мекемелери курулду. Калктын социалдык-инфаструктуралык маселелерин чечүүгө багытталган мындай аракеттер дагы улантылат. Анткени, туура жүргүзүлгөн экономикалык саясаттын негизинде казынабыз эселеп өсүп, мүмкүнчүлүктөрүбүз кеңейип барат”, – деди төрага.
