Бишкек, 17.07.2026. /Кабар/. Маданият, маалымат жана жаштар саясаты министри Мирбек Мамбеталиев Шанхай кызматташтык уюмуна мүчө мамлекеттердин эл аралык кинофестивалын расмий түрдө ачты. Иш-чара Чолпон-Ата шаарында, Ысык-Көл жээгинде өтүүдө.
Министр катышуучуларга, уюштуруучуларга жана конокторго кайрылуусунда бул ири эл аралык форум Шанхай кызматташтык уюму түзүлгөнүнүн 25 жылдыгына туш келгенин белгиледи.
“Кинематография — бул биздин элдерди бириктирген уникалдуу жумшак күч жана эл аралык көпүрө. Кино адамзат баалуулуктарынын универсалдуу тилинде сүйлөп, бири-бирибиздин салт-санаабызды, менталитетибизди жана тарыхый мурастарыбызды тереңирээк түшүнүүгө жардам берет. Дал ушул экран искусствосу аркылуу өз ара урматтоого, теңчиликке жана биргелешкен өнүгүүгө умтулууга негизделген фундаменталдык шанхай духу эң таасын чагылдырылган”, — деди министр.
Анын айтымында, улуттук кинематографияны өнүктүрүү Кыргызстандагы мамлекеттик маданий саясаттын артыкчылыктуу багыттарынын бири бойдон калууда. Бул тармакка Садыр Жапаров тарабынан өзгөчө көңүл бурулуп жатканы белгиленди.
“Президенттин колдоосунун аркасында ата мекендик кино жаңы сапаттык деңгээлге чыгып, эл аралык деңгээлде таанылып жатат. Кыргыз режиссёрлорунун тасмалары барган сайын дүйнөлүк абройлуу кинофестивалдардын катышуучулары жана жеңүүчүлөрү болууда”, — деп кошумчалады ал.
Министр фестивалдын эл аралык профессионалдык коомчулук үчүн маанисин да баса белгиледи. Анын айтымында, төрт күн бою Чолпон-Ата ШКУ өлкөлөрүнүн маданий борборуна айланып, белгилүү кино чеберлерин, продюсерлерди жана жаш режиссёрлорду бириктирет.
“Бул фестиваль ШКУ өлкөлөрүнүн киноиндустриясы үчүн күчтүү профессионалдык аянтча болот. Бул жерде келечектеги биргелешкен долбоорлордун пайдубалы түптөлүп, узак мөөнөттүү чыгармачылык кызматташтык өнүгөт”, — деди Мирбек Мамбеталиев.
Министр сөзүнүн аягында катышуучуларга чыгармачылык шыктануу, акыйкат атаандаштык жана жаңы кесиптик ийгиликтерди, ал эми коноктор менен көрүүчүлөргө Ысык-Көл жээгинде дүйнөлүк кинематография менен таанышып, унутулгус таасирлерди алууну каалады.
