Бишкек, 14.07.26. /Кабар/. АКШдагы Жоржтаун университетинин окумуштуулары мээ жаңы көндүмдөрдү өздөштүргөн сайын физикалык жактан кайра түзүлөрүн аныкташты. Бул тууралуу Science Daily журналынын маалыматына таянып, Известия билдирет.
Изилдөөнүн жыйынтыгында жакшы өздөштүрүлгөн аракеттер автоматтык түрдө аткарылып, мээ бир эле учурда бир нече тапшырманы натыйжалуу аткара алары белгилүү болду.
Экспериментке катышкан ыктыярчылар 5-10 жума бою мобилдик тиркеме аркылуу автоунаалардын сүрөттөрүн иргөө боюнча 30 миңден ашуун тапшырманы аткарышты. Изилдөөчүлөр машыгууга чейин жана андан кийин катышуучулардын мээсин функционалдык магниттик-резонанстык томография жана электроэнцефалография аркылуу текшеришти.
Баштапкы этапта тапшырмаларды аткарууда чечим кабыл алуу жана пландаштыруу үчүн жооп берген префронталдык кабык активдүү иштегени аныкталды. Бирок бир нече жумалык машыгуудан кийин мээнин активдүүлүгү эстутумга жана татаал объекттерди таанууга жооп берген убактылуу бөлүккө өткөн.
Изилдөөнүн авторлорунун бири Патрик Кокстун айтымында, узак мөөнөттүү машыгуу мээде жаңы нейрондук байланыштарды түзүп, маалыматты түздөн-түз реакция борборлоруна жеткирүүгө шарт түзөт. Мунун аркасында префронталдык кабык башка тапшырмалар үчүн бошоп, адам бир эле учурда дагы бир ишти натыйжалуу аткара алат.
Окумуштуулар белгилегендей, тапшырма канчалык деңгээлде автоматташса, адам экинчи ишти ошончолук жеңил жана так аткарат. Бул жыйынтык чыныгы көп тапшырмалуулук мээнин нейрондук тармактарынын өзгөрүшү аркылуу мүмкүн экенин көрсөтөт.
Адистердин пикиринде, бул ачылыш зыяндуу адаттарды жана көз карандылыкты изилдөөдө да маанилүү роль ойнойт. Анткени автоматташкан аракеттер аң-сезимдин көзөмөлүнөн бир кыйла көз карандысыз болуп калат. Учурда окумуштуулар үйрөнүлгөн көндүмдөрдүн мээнин бир бөлүгүнөн экинчи бөлүгүнө кандай механизмдер аркылуу өтөрүн аныктоо боюнча изилдөөлөрдү улантышууда.
