Бишкек, 29.07.26. /Кабар/. Манас шаарында 6 жаңы мектеп курулууда.
Курулуш министрлигинен билдиришкендей, алардын бири — Ак-Тилек кичи шаарчасында салынып жаткан 375 окуучуга ылайыкталган мектеп.
Объекттин курулуш иштери үстүбүздөгү жылдын март айында башталган. Бүгүнкү күндө имараттын чатыры толук жабылып, ички шыбалып, сырткы жылуулоо иштери жүргүзүлүүдө.
Долбоорго ылайык, мектеп имаратынын жалпы аянты 4 200 чарчы метрди түзүп, А, Б, В жана Г блоктордон турат.
Мектеп заманбап талаптарга ылайык салынып, анда окуу класстарынан тышкары лабораториялар, китепкана, ашкана, дарыгердин кабинети, компьютердик класстар, эмгек кабинеттери, жыйындар залы жана бардык шарттары каралган спорт залы жайгашат.
