Бишкек, 20.07.26. /Кабар/. Баткен облусунда жергиликтүү жетекчилерге бизнес менен коопсуздукту кантип айкалыштыруу керектигин көрсөткөн өзгөчө кездешүү өттү. Бул тууралуу президенттин аймактагы өкүлчүлүгүнөн билдиришти.
Маалыматка ылайык, облус башчысы Мамыржан Рахимов район-шаар жана айыл өкмөт башчыларын Лейлектеги "Салкын-Жай" эс алуу комплексине чогултуп, аны башкалар үчүн үлгү катары көрсөттү.
Жеке ишкер Талант Осмонов бул долбоорго 50 млн сом жумшап, жаңы жумуш орундарын түзүп, жергиликтүү бюджетти чыңдады.
Комплексте салтанат залы, ресторан, A-frame үйлөрү жана эң башкысы - эркектер, аялдар жана балдар үчүн өзүнчө бассейндер каралган.
"Бассейндерде санитардык нормалар сакталып, атайын даярдыктан өткөн куткаруучулар тынымсыз нөөмөттө турушат", - деп айтылат маалыматта.
Жыйынтыгында район башчыларына мамлекеттик-жеке өнөктөштүк аркылуу ушундай заманбап эс алуу жайларын куруу тапшырылды. Бул жөн гана туризм эмес - жайкысын калктын, өзгөчө балдардын сууга чөгүп кетүү коркунучунун алдын алууга багытталган эң натыйжалуу кадам.
