Бишкек, 24.04.26. /Кабар/. Президенттин Баткен облусундагы өкүлү Мамыржан Рахимов Кызыл-Кыя шаарына болгон иш сапарынын алкагында шаарды таза суу менен камсыздоо долбоорун талкуулады. Бул тууралуу облустук өкүлчүлүктөн билдиришти.
Долбоор боюнча Кадамжай районунун Кара-Кыштак айылынан (Исфайрам-Сай дарыясынан) шаарга чейин 25 чакырым аралыкка суу түтүктөрүн тартуу пландалууда.
Суу өз нугу менен агып келет, бул электр энергиясын үнөмдөөгө жана тейлөө чыгымдарын кыйла азайтууга мүмкүндүк берет.
Долбоор ишке ашса, 100 миңден ашуун тургун суткасына 24 саат бою үзгүлтүксүз таза суу менен камсыз болот.
Азыркы тапта техникалык-экономикалык негиздеме иштелип жатат. Долбоордук документтерди даярдоого жергиликтүү бюджеттен 4 млн сом бөлүнгөн.
