Бишкек, 18.06.26. /Кабар/. Бүгүн Жогорку Кеңештин жыйынында министрлер кабинетинин төрагасы демилгелеген эки маанилүү мыйзам долбоору каралып, кабыл алынды.
Парламенттен билдиришкендей, анын биринчиси "Граждандык кодекске жана "Турак жайды өрттөн жана табигый кырсыктардан милдеттүү камсыздандыруу жөнүндө" мыйзамга өзгөртүүлөрдү киргизүү тууралуу" мыйзам долбоору. Депутаттар экинчи жана үчүнчү окууда кабыл алышты.
Финансы, бюджет, ишкердик жана атаандаштыкты өнүктүрүү боюнча комитетинин төрагасы Алтынбек Кудайбердиевдин айтымында, бул өзгөртүүлөр камсыздандыруу системасынын финансылык туруктуулугун жогорулатуу, кырсыкка учураган жарандардын укуктарын коргоону күчөтүү, камсыздандыруу төлөмдөрүн өз убагында жана кепилденген тартипте төлөөнү камсыз кылуу максаттарын көздөйт.
Мындан тышкары, жыйында "Товардык биржалар жөнүндө" мыйзам долбоору каралып, экинчи окууда жактырылды. Бул мыйзам биржа соода-сатыктарынын катышуучуларынын ортосундагы мамилелерди мыйзамдык деңгээлде иретке келтирип, укуктук боштуктарды жоюуга багытталган.
