Бишкек, 17.06.26. /Кабар/. Кыргызстандык белгилүү суучул Владислав Шулико Баткенде кезектеги ийгилигин жаратты.
Президенттин аймактагы өкүлчүлүгүнөн билдиришкендей, ал Баткен районундагы 2 чакырымга созулган Төрт-Гүл суу сактагычын 30 мүнөттө сүзүп өттү.
Владислав Шуликонун коопсуздугун камсыздоо үчүн тиешелүү кызмат өкүлдөрү тартылды.
Аталган иш-чара 31-июлдан 2-августка чейин Ысык-Көл облусунда өтө турган UIM F1H2O World Championship – Grand Prix of Kyrgyzstan – Issyk-Kul 2026 эл аралык спорттук иш-чарасын даңазалоо максатында уюштурулган.
Эске салсак, 2026-жылдын 1-июнунда Италиянын Сардиния аралында өткөн расмий салтанатта Кыргызстан дүйнө чемпионатынын эстафеталык желегин кабыл алып, UIM F1H2O дүйнө чемпионатынын этаптарынын бирин өз аймагында өткөрүү укугуна расмий түрдө ээ болгон.
Бүгүнкү күндө республикалык эстафета өлкөнүн бардык аймактарын камтып, Кыргызстандын туристтик потенциалын таанытуу, ошондой эле алдыдагы дүйнөлүк деңгээлдеги спорттук мелдешке коомчулуктун көңүлүн буруу максатында өткөрүлүүдө.
