Бишкек, 02.02.26. /Кабар/. Кыргыз футбол биримдигинин башкы катчысы Медербек Сыдыков Эл аралык футбол федерациясынын (ФИФА) 2026-жылдагы тизмесине кирген кыргызстандык калыстарга жана алардын жардамчыларына ФИФА лицензияларын салтанаттуу түрдө тапшырды.
Биримдиктен билдиришкендей, бул тизмеге Кыргызстандан жалпы 17 адис кирди. Эми алар өлкө намысын коргоп, эл аралык деңгээлдеги мелдештерде калыстык кылышат.
Жолугушуунун алкагында Медербек Сыдыков Түркиянын Анталия шаарында өтө турган окуу-машыгуу жыйынына аттанып жаткан калыстар менен да баарлашты. Башкы катчы катышуучуларга ийгилик каалап, бул жыйын калыстардын кесипкөйлүгүн арттырууда чоң мааниге ээ экенин белгиледи.
Окуу-машыгуу жыйыны 2-февралдан 18-февралга чейин созулат. Ага жалпы 18 калыс, 24 калыс жардамчысы, Кыргыз футбол биримдигинен 7 жана Азия футбол конфедерациясынан (АФК) 1 инструктор, ошондой эле медициналык кызматкерлер катышат.
Бул машыгуулар калыстардын физикалык даярдыгын жогорулатууга, теориялык билимдерин тереңдетүүгө жана эл аралык стандарттарга ылайык тажрыйба алмашуусуна багытталган.
