Бишкек, 17.02.25. /Кабар/. Кыргыз Республикасынын министрлер кабинетине караштуу Мамлекеттик кызмат жана жергиликтүү өз алдынча башкаруу иштери боюнча агенттиктин ишинин алкагында мамлекеттик администрациялардын башчыларынын – акимдердин жана шаар мэрлеринин психологиялык сапаттарын аныктоого багытталган мультипсихометрикалык тестирлөө жүргүзүлүүдө.
Мамлекеттик агенттиктен билдиришкендей, мамлекеттик кызматтын потенциалын жогорулатуу жана коррупциянын деңгээлин төмөндөтүү үчүн мамлекеттик жана муниципалдык кызматтарга квалификациялуу, кесипкөй жана чынчыл адамдарды тартуу маанилүү. Мультипсихометрикалык тестирлөө адамдардын психологиялык жана психофизиологиялык сапаттарын, ошондой эле алардын кесиптик потенциалын баалоого мүмкүндүк берет. Сыноо процессинде адам фактору минимумга түшүрүлүп, жасалма интеллекттин жардамы менен психологиялык портрет түзүлөт.
"Бул тестирлөө мамлекеттик кызматкерлердин жетекчилик кызматтарга ылайыктуулугун аныктоого, командадагы психологиялык туруктуулукту, чыр-чатакка тенденцияны аныктоого, ошондой эле депрессиянын белгилерин аныктоого жардам берет", — деп айтылат маалыматта.
