Бишкек, 23.02.26. /Кабар/. Жогорку Кеңештин төрагасы Марлен Маматалиев Өзбекстандын Кыргызстандагы элчиси Саидикрам Ниязходжаевди кабыл алды. Бул тууралуу парламенттен билдиришти.
Жолугушууда эки өлкө ортосундагы саясий-экономикалык, маданий-гуманитардык алакаларды арттыруу маселелери талкууланып, парламенттер аралык кызматташтыкты өнүктүрүү тууралуу да сөз болду.
Төрага Марлен Маматалиев Өзбекстан менен стратегиялык өнөктөштүктү тереңдетүүгө Кыргызстан кызыкдар экенин айтты. Ал мамлекет башчыларынын ынак мамилеси жана өз ара сапарлар кызматташтыкты жаңы деңгээлге көтөрөрүн белгиледи.
Марлен Маматалиев кыргыз-өзбек мамилесинде парламенттик дипломатиянын ролун белгилеп, КМШ ПАА жана ТүркПА алкагындагы биргелешкен иштер жемиштүү уланып жатканын айтты. Ошондой эле кызматташтык боюнча парламенттер аралык комиссиянын иши тууралуу да учкай кеп кылып, алакаларды кеңейтүүдө аталган аянтчанын маанилүүлүгүнө токтолду.
Өз кезегинде элчи Саидикрам Ниязходжаев Марлен Маматалиевди Жогорку Кеңештин төрагасы болуп шайланышы менен куттуктап, Өзбекстандын Сенатынын төрайымы Танзила Нарбаеванын жана Олий Мажлисинин Мыйзам чыгаруу палатасынын төрагасы Нуриддин Исмоиловдун жолдогон саламын жеткирди.
Андан сырткары, Өзбекстан Кыргызстандагы өнүгүүгө өзгөчө көңүл буруп, жетишкендиктерди кубаттаарын айткан Саидикрам Ниязходжаев элчилик ишмердүүлүгүнүн алкагында эки тараптуу кызматташтыкты өнүктүрүү жаатындагы пландары менен бөлүштү.
