Бишкек, 02.11.26. /Кабар/. Япониялык чыгармачыл топ Кыргызстандын маданияты жана эки өлкөнүн кызматташтыгы тууралуу видеоматериал даярдап жатат.
Маданият, маалымат жана жаштар саясаты министрлигинен билдиришкендей, Улуттук тарых музейине белгилүү жапон медиасүрөтчүсү, изилдөөчү, Цукуба университетинин доценти Очиаи Ёити баштаган делегация келди.
Делегациянын курамында Япониянын Эл аралык кызматташтык агенттигинин (JICA) Япониядагы жана Кыргызстандагы өкүлдөрү, анын ичинде өлкөдөгү туруктуу өкүлү Нишигата Котаро болду.
Коноктор үчүн тааныштыруу экскурсиясы уюштурулуп, анда Кыргызстандын тарыхый-маданий мурасы, улуттук каада-салттары жана музейдеги экспонаттар тууралуу маалымат берилди.
Ошондой эле жолугушууда салттуу искусство менен заманбап санариптик технологияларды айкалыштыруу жана эл аралык маданий кызматташтыкты өнүктүрүү маселелери талкууланды.
