Бишкек, 11.03.25. /Кабар/. Бүгүн башкы прокурор Максат Асаналиев Кытайдын Кыргызстандагы элчиси Лю Цзянпин менен жолугушту. Бул тууралуу прокуратурадан билдиришти.
Жолугушуунун жүрүшүндө эл аралык-укуктук кызматташтык жаатындагы эки тараптуу өз ара аракеттенүүнүн негизги багыттары жана анын мындан аркы өнүгүүсү талкууланды.
Тараптар өнөктөштүктүн оң жыйынтыктарын белгилеп, өзгөчө көңүлдү тажрыйба алмашуу жана окуу тренингдерин өткөрүү, прокуратуранын ишине заманбап технологиялар менен эл аралык стандарттарды киргизүү маселелерине бурушту.
Башкы прокурор ишкерлердин укуктарын коргоонун жана жагымдуу инвестициялык климатты түзүүнүн маанилүүлүгүн белгилеп, туруктуу укуктук чөйрө эки өлкөнүн экономикалык мамилелерин өнүктүрүүдө негизги фактор экендигин белгиледи.
Өз кезегинде Кытайдын элчиси Кыргызстандын Башкы прокуратурасынын мыйзамдуулукту чыңдоого, жарандардын жана ишкерлердин укуктарын коргоого, ошондой эле эки тараптуу кызматташтыкты кеңейтүүгө багытталган укуктук демилгелерин толугу менен колдоого даяр экенин билдирди.
Жолугушуунун соңунда эки тарап тең мындан аркы өнөктөштүккө жана укуктук кызматташтыкты чыңдоого биргелешкен күч-аракет жумшаларын белгилешти.
