Бишкек, 03.12.25. /Кабар/. Кыргызстан Жапайы фаунанын жана флоранын жоголуп бараткан түрлөрү менен соода кылууну жөнгө салуу жөнүндөгү конвенция (СИТЕС) 20-конференциясында сейрек түрлөрдү сактоо боюнча тажрыйбасын сунуштады.
Жаратылыш ресурстары, экология жана техникалык көзөмөл министрлигинен билдиришкендей, анда Биоресурстар башкармалыгынын жаныбарлар дүйнөсү бөлүмүнүн башчысы Эркинбек Мамаев өлкө аймагында жейрендерди кайра жайгаштыруу (реинтродукция) боюнча жүрүп жаткан иштер тууралуу билдирүү жасады.
Ал жейрен популяциясын калыбына келтирүү — Кыргызстандагы жапайы туяктуулардын санын бекемдөөгө багытталган комплекстүү чаралардын маанилүү бөлүгү экенин баса белгиледи. Бул иш-аракеттер кар илбиси үчүн негизги азыктык база болуп саналган жейрендердин санын көбөйтүүгө да өбөлгө түзөт.
Өз сөзүндө Мамаев Кыргызстандын биологиялык ар түрдүүлүктү коргоо жана сейрек кездешүүчү жаныбарлар түрлөрүн сактоо багытындагы эл аралык аренадагы активдүү ишмердигин белгиледи.
Ошондой эле ал конференция комитеттеринин жыйынында сөз сүйлөп, жапайы жаныбарлар соодасын көзөмөлдөөгө байланыштуу эл аралык колдонмолордун жеткиликтүүлүгүн жана эффективдүүлүгүн жогорулатууга багытталган бир катар сунуштарды киргизди.
Конференциянын алкагында Мальта Республикасынын делегациясы менен эки тараптуу жолугушуу да өтүп, анда жүк ташууларды көзөмөлдөөнү күчөтүү жана мындан аркы эки тараптуу кызматташууну өнүктүрүү маселелери талкууланды.
