Ысык-Көл, 02.09.26 /Кабар/. Кырчын жайлоосундагы “Көчмөндөр ааламында” VI Дүйнөлүк көчмөндөр оюндарынын алкагындагы иш-чаралар уланууда.
Эртең мененден тарта жайлоого жергиликтүү тургундар жана чет өлкөлүк меймандар келип, улуттук маданиятты, каада-салтты жана көчмөндөрдүн жашоо-турмушун чагылдырган иш-чараларга күбө болууда.
Жайлоодо майрамдык маанай өкүм сүрүп, элдин маанайы көтөрүңкү.
Меймандар үчүн боз үйлөр тигилип, улуттук оюндар, кол өнөрчүлүк көргөзмөлөрү, музыкалык жана маданий программалар уюштурулууда. Айрыкча чет элдик коноктор кыргыз элинин салт-санаасына, улуттук кийимдерине, кол өнөрчүлүгүнө жана боз үй маданиятына кызыгуу менен мамиле кылууда. Коноктор сүрөткө түшүп, кыргыз маданияты менен жакындан таанышууда.
Белгилей кетсек, "Кабар" маалымат агенттиги VI Дүйнөлүк көчмөндөр оюндарынын Эл аралык маалыматтык өнөктөшү катары дүйнө көчмөн элдеринин мурасын сактоого жана даңазалоого багытталган ири этномаданий жана спорттук иш-чараны ыкчам жана көп тилдүү маалыматтык чагылдырууну камсыз кылат.
"Кабар" 1937-жылы негизделген Кыргызстандын алгачкы маалымат агенттиги. Агенттик кыргыз, орус, англис, араб, түрк жана кытай тилдеринде жаңылыктарды таратып, Кыргызстандагы жана Борбор Азиядагы маанилүү окуяларды чагылдырат.
