Бишкек, 29.04.26. /Кабар/. Жусуп Баласагын атындагы Кыргыз улуттук университетинин Журналистика жана коммуникация институтунда филология илимдеринин кандидаты Чынар Капарованын “Улуттук телерадиоберүү корпорациясы (1926–2026)” аттуу китебинин бет ачар аземи өттү. Бул тууралуу аталган институттан билдиришти.
Маалыматка ылайык, китеп Кыргыз радиосунун 95 жылдыгына жана институттун 70 жылдыгына карата жарык көрдү.
Иш-чарада мамлекеттик катчы Арслан Койчиев журналистика коомдун эс-тутуму экенин айтып, бул китеп келечек муундар үчүн ишенимдүү маалымат булагы болорун баса белгиледи.
Тарыхчы, публицист жана журналист Кыяс Молдокасымов китепте кыргыз телерадиосунун калыптаныш жана өнүгүү этаптары кеңири чагылдырылганын кошумчалады.
Белгиленгендей, китепте өлкөнүн советтик доордон тартып эгемендик мезгилине чейинки радиоуктуруу жана телекөрсөтүү тармагынын калыптанышы, өнүгүү этаптары, мамлекеттик жана коомдук макамдагы ишмердүүлүгү кеңири баяндалат.
Автор эмгекти даярдоодо архивдик материалдарга, жеке иш тажрыйбасына, ошондой эле топтолгон аудио жана видео булактарга таянган.
