Бишкек, 16.01.26. /Кабар/. Бүгүн көркөм гимнастика боюнча 3 машыктыруучуга "Кыргыз Республикасынын эмгек сиңирген машыктыруучусу" наамы тапшырылды. Бул тууралуу Дене тарбия жана спорт мамлекеттик агенттигинен билдиришти.
Ардак наам көркөм гимнастиканы өнүктүрүүгө кошкон зор салымы, көп жылдык үзүрлүү эмгеги жана жогорку жетишкендиктери үчүн Гүлнара Мамыркулова, Жаңыл Каймазарова жана Сабина Ибраимовага тапшырылды.
Сыйлыктарды тапшырган Дене тарбия жана спорт мамлекеттик агенттигинин директору Казыбек Молдажиев машыктыруучуларды жетишкен ийгиликтери менен куттуктап, алардын тарбиялануучулары эл аралык аренада өлкөнүн намысын татыктуу коргоп жатканын белгиледи.
Ошондой эле ал талыкпаган эмгеги жана кесипкөйлүгү үчүн ыраазычылык билдирип, алдыда өтө турган көркөм гимнастика боюнча Азия чемпионатына даярдык иштерине ийгилик каалады.
