Бишкек, 07.07.26 /Кабар/. Кочкор районунда 2-июль күнү катуу жааган жаандын кесепеттерин жоюу жана селден жабыркаган тургундарды колдоо боюнча иштер активдүү уланууда. Бул тууралуу Өзгөчө кырдаалдар министрлигинен билдиришти.
Маалыматка ылайык, райондун өзгөчө кырдаалдар бөлүмү тарабы жергиликтүү бийлик өкүлдөрү менен биргеликте Соң-Көл жайлоосунун Чоң-Акташ участкасында жашаган чабан С.Казмиевге азык-түлүк жана кургак отун жеткиришти.
Ошондой эле Көл-Үкөк жайлоосундагы Тес-Төр көпүрөсүн сел суусу алып кеткендиктен, каттамы үзүлгөн чабандар да азык-түлүк менен камсыз болду. Мындан сырткары, Семиз-Бел айылынын Сары-Чат участкасында селден жабыркаган тургун С. Иманкуловго азык-түлүк жана акчалай жардам көрсөтүлдү.
Куткаруучулар Кара-Суу, Чолпон жана Кум-Дөбө айыл аймактарына караштуу жайлоолордогу абалды жеринен текшеришти. Мониторингдин жыйынтыгында аталган аймактарда өзгөчө кырдаалдарга байланыштуу кошумча көйгөйлөр катталган эмес.
