Бишкек, 02.09.26. /Кабар/. VI Дүйнөлүк көчмөндөр оюндарын өткөрүү учурунда Кырчын жайлоосундагы коомдук тартип жана коопсуздук онлайн видеокамералар аркылуу көзөмөлдөнүүдө. Бул тууралуу Ички иштер министрлигинен билдиришти.
Маалыматка ылайык, жайлоодо ИИМдин Ички аскерлеринин атайын жабдылган "Аска" көчмө башкаруу борбору кызмат өтөөдө.
"Борбор аркылуу аймактагы кырдаалга туруктуу мониторинг жүргүзүлүп, коопсуздукту камсыз кылууга тартылган күчтөрдүн иш-аракети координацияланууда. Бул түзүлгөн кырдаалга жараша ыкчам чечим кабыл алууга мүмкүндүк берет", - деп айтылат маалыматта.
Белгилей кетсек, VI Дүйнөлүк көчмөндөр оюндарынын алкагындагы иш-чаралар 31-августтан 6-сентябрга чейин Кыргызстанда өтүүдө.
"Кабар" маалымат агенттиги VI Дүйнөлүк көчмөндөр оюндарынын Эл аралык маалыматтык өнөктөшү катары дүйнө көчмөн элдеринин мурасын сактоого жана даңазалоого багытталган ири этномаданий жана спорттук иш-чараны ыкчам жана көп тилдүү маалыматтык чагылдырууну камсыз кылат.
"Кабар" 1937-жылы негизделген Кыргызстандын алгачкы маалымат агенттиги. Агенттик кыргыз, орус, англис, араб, түрк жана кытай тилдеринде жаңылыктарды таратып, Кыргызстандагы жана Борбор Азиядагы маанилүү окуяларды чагылдырат.
