Бишкек, 02.11.26. /Кабар/. Грузиянын пенитенциардык мекемелери видео байкоонун натыйжалуулугун жогорулатуу жана потенциалдуу коркунучтарды тез арада аныктоо үчүн жасалма интеллектти колдонууну пландаштырууда. Бул тууралуу юстиция министри Паата Салия билдиргенин Грузиянын маалымат каражаттары кабарлашууда.
"Биз эрте эскертүүлөргө мүмкүндүк берүүчү жасалма интеллектти активдүү түрдө ишке ашыруунун үстүндө иштеп жатабыз", - деп белгиледи министр.
Анын айтымында, учурда түрмө кызматкерлери видео көзөмөл камераларды өз алдынча көзөмөлдөп турушат. Бул каталарга жана жооп кайтаруунун кечигүүсүнө алып келиши мүмкүн. Андыктан видео камераларды кол менен көзөмөлдөө зарылдыгын алып салуу адамдык катанын таасирин азайтып, жооп кайтаруудагы кечигүүлөрдү жок кылат.
Жаңы система потенциалдуу кооптуу кырдаалдарды автоматтык түрдө аныктап, кызматкерлерге тез арада эскертүү берет деп күтүлүүдө. Система жалпы аймактардагы жана суицид же психикалык бузулуу коркунучу жогору болгон соттолуучулар жашаган аймактардагы өзгөчө кырдаалдарды жазып алат. Санариптик чечимдердин киргизилиши түрмөлөрдөгү коопсуздукту, тартипти жана жалпы туруктуулукту жакшыртууга багытталган.
