Бишкек, 24.01.25. /Кабар/ Министрлер кабинетинин төрагасы Адылбек Касымалиев Жалал-Абад облусуна болгон жумуш сапарынын алкагында облусту өнүктүрүү маселелери боюнча жыйын өткөрдү.
Адылбек Касымалиев белгилегендей, президенттин тапшырмасына ылайык, быйыл 31-август Кыргызстандын Эгемендүүлүк күнүн майрамдоону Жалал-Абад облусунда өткөрүү пландаштырылган.
Жыйындын жүрүшүндө масштабдуу майрамдык иш-чараларды өткөрүүгө даярдык көрүү маселелери талкууланып, программанын долбоору сунушталды.
Белгиленгендей, үстүбүздөгү жылы Жалал-Абад облусунда Эгемендүүлүк күнүнө карата 30дан ашуун ишкана, социалдык жана инфраструктуралык объектилерди ачуу пландалууда.
Отурумдун жыйынтыгында министрлер кабинетинин төрагасы мамлекеттик жана жергиликтүү бийлик органдарына өлкөнүн Эгемендүүлүк күнүн майрамдоону жогорку деңгээлде өткөрүү, инвестициялык долбоорлорду ишке ашырууда ата мекендик жана чет элдик инвесторлорго көмөк көрсөтүү, ошондой эле облустун социалдык-экономикалык жана инфраструктуралык өнүгүшүнүн башка маселелери боюнча бир катар тапшырмаларды берди.
Мындан тышкары, минкаб төрагасы жумуш сапарынын алкагында Мамлекеттик ипотекалык компаниясы тарабынан Жалал-Абад шаарында ишке ашырылып жаткан турак жай комплекстеринин курулушунун жүрүшү менен таанышты.
Батирлер “Менин үйүм” мамлекеттик турак жай программасынын катышуучуларына “Социалдык ипотека”, “Жеңилдетилген ипотека”, “Жеткиликтүү ипотека” багыттары боюнча, ошондой эле үлүштүк турак жай куруу механизминин алкагында берилет.
“Асман Резиденс 2” турак жай комплекси 400дөн ашуун батирден турат. Долбоор 2025-жылдын экинчи кварталына карата аяктоосу күтүлүүдө. Ал эми, “Асман Резиденс 1” турак жай комплекси 600дөн ашуун батирден турат. Анын курулуш иштери үстүбүздөгү жылдын апрель айында бүтөөрү күтүлүүдө.
Иштин жүрүшү менен жеринде таанышып чыккандан кийин, курулуш иштерин сапаттуу жана өз убагында бүтүрүү боюнча тиешелүү түзүмдөргө тапшырмалар берилди.
