Бишкек, 12.12.25. /Кабар/. Каракол шаарынын Кашка-Суу кичи районунда көп профилдүү медициналык борбор ачылат. Бул тууралуу Ысык-Көл облусун өнүктүрүү фондунан билдиришти.
Маалыматта белгиленгендей, жергиликтүү дарыгер жеке медициналык борбор куруу максатында фондго долбоор жазып кайрылган. Байкоочу кеңеш долбоорду карап чыгып, ишкерге 30 млн сом пайызсыз насыя бөлүп берүү чечимин кабыл алган.
Борбордо бейтаптарга жогорку технологиялык жардамдар, сапаттуу жана жеткиликтүү медициналык кызматтар, ошондой эле чукул жана пландаштырылган хирургиялык операциялар жасалат.
Эки кабаттан турган имарат операциялык блок, стационардык бөлмөлөр, эмкана жана таануу бөлмөлөрүнөн турат. Жалпысынан 20дан ашуун жаңы жумуш орундары тузүлмөкчү. Бүгүнкү күндө имараттын ички-тышкы жасалгалоо иштери жүрүп, тийиштүү медициналык жабдуулар сатылып алынууда.
