Бишкек, 10.07.26. /Кабар/. Кадамжайдын Гүлдүрөмө айылында жайгашкан "Ак-Өргө Курулуш" ЖЧКнын шагыл майдалоочу цехи ишин баштап, алгачкы продукциясын чыгарууда.
Президенттин Баткен облусундагы өкүлчүлүгүнөн билдиришкендей, өндүрүш ишканасынын курулушу жеке инвестициянын эсебинен ишке ашырылып, анын жалпы сметалык баасы 300 миң долларды түздү.
Жергиликтүү бийлик тарабынан долбоорду ишке ашыруу үчүн ишкерге 3 гектар жер аянты ижарага берилген.
Ишкана саатына 100 тонна шагыл майдалоо мүмкүнчүлүгүнө ээ. Өндүрүлгөн курулуш материалдары ички рыноктун суроо-талабын камсыздоого, ошондой эле аймакта жүрүп жаткан курулуш иштерин сапаттуу материал менен камсыз кылууга багытталат.
Өндүруштүн ишке кириши менен 5 жаңы туруктуу жумуш орду түзүлдү. Бул жергиликтүү тургундарды жумуш менен камсыз кылууга жана райондун өнөр жай потенциалын кеңейтүүгө өз салымын кошот.
Президенттин Баткен облусундагы өкүлүнүн орун басары Абдирашит Ташбалтаев, ишкананын ишмердүүлүгү менен таанышып, 2026-жылдын 31-августуна ачууга даярдоону тапшырды.
