Бишкек, 10.07.26. /Кабар/. Кадамжай шаарынын Пүлгөн айылында Бирдиктүү кызмат көрсөтүү борборунун курулушу жүрүүдө.
Президенттин Баткен облусундагы өкүлчүлүгүнөн билдиришкендей, долбоор Баткен облусун өнүктүрүү программасынын алкагында ишке ашырылып жатат.
Курулуш иштерине республикалык бюджеттен 100 млн сом, жергиликтүү бюджеттен 10 млн сом бөлүнгөн.
Райондогу Социалдык фонд, Кадастр жана почта сыяктуу 14төн ашык мамлекеттик мекемени бир жерге топтоп, калкка ыңгайлуу шарт түзүп, жол тыгынын азайтат.
Имаратта 20 бирдиктүү терезе жана 1 гектарлык унаа токтотуучу жай болот.
Бул имараттын курулушу 1988-жылы оорукана катары башталып, токтоп калган. Эми ал толугу менен заманбап борборго айландырылууда.
Объекттин даярдыгы менен облус башчысынын орун басары Абдирашит Ташбалтаев таанышты. Ишкананы 2026-жылдын аягына чейин пайдаланууга берүү пландалууда.
