Бишкек, 01.06.26. /Кабар/. Баткен облусунун Кадамжай районунда арпа эгинин жыйноо иштери башталды.
Суу ресурстары, айыл чарба жана кайра иштетүү өнөр жайы министрлигинен билдиришкендей, алгачкы жыйынтыктарга ылайык 1 гектар аянттан 42 центнер түшүм алынууда.
"Бул көрсөткүч дыйкандардын эмгегинин, агротехникалык талаптардын өз убагында аткарылышынын жана түшүмдүүлүктү жогорулатууга багытталган иштердин натыйжасы. Учурда район аймагында түшүм жыйноо иштери улантылып жатат", - деп айтылат маалыматта.
Белгилей кетсек, Кадамжай району боюнча 4395 гектар жерге кылкандуу дан эгини эгилген. Анын ичинен 450 гектары арпа, калганын буудай түзөт. 14 комбайн түшүм жыйноо иштерине даяр.
