Бишкек, 21.10.25. /Кабар/. Франциялык сүрөтчүлөр Беш-Арал мамлекеттик жаратылыш коругунда жапайы жаныбарларды сүрөткө түшүрүштү. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Ведомствонун маалыматына ылайык, октябрь айында Франциядан келген жаратылыш сүйүүчүлөрдүн тобу (“Wildlife Expeditions Kyrgyzstan”) ЮНЕСКОнун Дүйнөлүк жаратылыш мурастарынын тизмесине кирген Беш-Арал мамлекеттик жаратылыш коругунда болушту.
Экспедиция Жалал-Абад облусунун Чаткал районундагы Беш-Арал мамлекеттик жаратылыш коругунун уникалдуу биологиялык ар түрдүүлүгүнө баа берүү, Кыргызстандын Батыш Тянь-Шань аймагында байырлаган жапайы жаратылышын эл аралык деңгээлде таанытуу, биотүрдүүлүктүн абалы тууралуу маалымат алуу жана экотуризмди өнүктүрүүгө салым кошуу максатын көздөдү.
Иш-чаранын жүрүшүндө сүрөтчүлөр коруктун кызматкерлери тарабынан керектүү жабдуулар менен камсыздалып, техникалык коопсуздук эрежелери менен тааныштырылып, жапайы жаныбарлардын тынчтыгын бузбоо боюнча бардык талаптарды аткарышты.
Сүрөткө тартылган материалдар Кыргызстандын жаратылышын дүйнөлүк коомчулукка таанытуу максатында пайдаланылмакчы.
