Бишкек, 24.03.26. /Кабар/. Кыргыз футбол биримдигинде ФИФА эксперти Ричард Аллендин катышуусунда скаутинг боюнча семинар өтүп жатат.
Биримдиктен билдиришкендей, семинарда катышуучулар оюнчуларды издеп табуу жана баалоо боюнча заманбап ыкмаларды үйрөнүп, беттештерди талдоо жана келечеги бар футболчуларды аныктоо боюнча практикалык билим алышууда.
Ошондой эле программада Talents Cup турниринин беттештерин көрүү жана адистер менен суроо-жооп форматындагы индивидуалдык иштер каралган.
"Бул семинар ата мекендик адистердин квалификациясын жогорулатууга жана Кыргызстанда футболчуларды тандоо системасын өнүктүрүүгө чоң салым кошот", — деп айтылат маалыматта.
Семинардын башкы инструктору Ричард Аллен — скаутинг жана таланттарды аныктоо боюнча англиялык адис, ФИФАнын натыйжалуулугун жогорулатуу боюнча эксперт. Ал "РБ Лейпциг", "Куинз Парк Рейнджерс", "Тоттенхэм" сыяктуу бир катар клубдарда скаут катары иштеген тажрыйбага ээ.
Белгиленгендей, 22-мартта башталган семинар 25-мартка чейин уланмакчы.
Скаутинг — бул таланттуу оюнчуларды издөө, алардын оюнуна көз салуу жана деталдуу талдоо жүргүзүү процесси.
