Бишкек, 02.07.26 /Кабар/. Сокулук районунун Сарбан айылындагы “Элита” мамлекеттик асыл тукум станциясында суюк азот өндүрүүчү жабдуулар толук модернизацияланды. Бул тууралуу Ветеринардык кызматтан билдиришти.
Маалыматка ылайык, долбоор КОРIA борбору менен биргеликте ишке ашырылды.
Жүргүзүлгөн оңдоо жана жаңылоо иштеринин натыйжасында станциянын өндүрүштүк мүмкүнчүлүгү кыйла жогорулап, кызматкерлер үчүн коопсуз жана заманбап эмгек шарттары түзүлдү. Ошондой эле өлкө боюнча жасалма уруктандыруу кызматтарын көрсөтүү үчүн зарыл болгон суюк азотту үзгүлтүксүз өндүрүү жана жеткирүү мүмкүнчүлүгү бекемделди.
“Суюк азот жасалма уруктандыруу системасынын негизги компоненти болуп саналат. Ал –196 градус температурада асыл тукум букалардын уруктарын узак мөөнөткө сапатын жоготпой сактоого мүмкүндүк берет. “Элита” мамлекеттик асыл тукум станциясы Кыргызстандагы жасалма уруктандыруу кызматтарын көрсөткөн негизги борборлордун бири болуп эсептелет", - деп айтышты кызматтан.
Белгилей кетсек, былтыр республикалык бюджеттен 60 млн сом бөлүнүп, 200 миңден кем эмес уй жана кунаажынга жасалма уруктандыруу жүргүзүү пландалган. Бул максатта Суу ресурстары, айыл чарба жана кайра иштетүү өнөр жай министрлиги Швейцария жана Россиядан жогорку генетикалык сапаттагы букалардын уруктарын сатып алган.
Учурда өлкө боюнча фермерлер “Симментал”, “Швиц”, “Абердин-Ангус” жана “Голштино-Фриз” породасындагы асыл тукум букалардын уруктарын акысыз алып, жасалма уруктандыруу аркылуу алынган алгачкы төлдөрдү көрө башташты.
