Бишкек, 16.01.26. /Кабар/. Бүгүн Жогорку Кеңештин депутаттары Бишкектеги таштандыны кайра иштетүү аркылуу электр энергиясын өндүрүүчү эко-технологиялык заводдо көчмө жыйын өткөрдү.
Парламенттен билдиришкендей, иш-чарага калаа мэри Айбек Жунушалиев баштаган тиешелүү муниципалдык кызматтардын өкүлдөрү да катышты.
Алгач эл өкүлдөрү заводдун ишмердүүлүгү, материалдык-техникалык мүмкүнчүлүктөрү жана өндүрүштүк кубаттуулугу менен таанышып, таштандыларды кабыл алуу, өрттөө жана электр кубатын алуу процесстерин жеринен көрүп чыгышты. Ишкананын жооптуу кызматкерлери автоматташтырылган системалар, техникалык операцияларды башкаруу жана экологиялык коопсуздук талаптарынын сакталышы тууралуу да маалымат беришти.
Калаа мэри Айбек Жунушалиев белгилегендей, учурда күнүнө 1000 тоннага жакын таштанды иштетилип, саатына 30 кВт электр энергиясы өндүрүүлүүдө. Келечекте ишкананын өндүрүштүк кубаттуулугун дагы да арттыруу маселеси каралган.
Иш-чаранын жүрүшүндө заводдун ишмердүүлүгүнө байланышкан маселелер да талкууланды.
Көчмө жыйында мындан тышкары Бишкек шаарындагы түтүн-ыш маселеси, аны чечүү жолдору, абанын сапатын жакшыртуу жана калаадагы жол тыгындарын азайтуу маселелери боюнча аткарылып жаткан иштер тууралуу да маалымат угулуп, сунуш-пикирлер айтылды.
