Бишкек, 09.07.26. /Кабар/. Кызыл-Кыя шаарында курулуш материалдарын өндүрүүгө адистешкен "Асыл Холдинг" жоопкерчилиги чектелген коомунун жаңы ишканасы ишке киргизилүүдө. Бул тууралуу президенттин Баткен облусундагы өкүлчүлүгүнөн билдиришти.
Долбоордун алкагында шаардык мэрия тарабынан жеке ишкерге 0,4 гектар муниципалдык жер аянты даяр өндүрүштүк имараты менен кошо ижарага берилген.
Жеке инвестор тарабынан түзүлгөн базага 13,1 млн сом инвестиция тартылып, зарыл болгон жабдуулардын бардыгы орнотулду. Учурда сыноо иретинде алгачкы продукциялар чыгарыла баштады.
Ишкана толук ишке киргенде күнүнө 60-70 тонна курулуш материалдарын чыгарылып, жергиликтүү тургундар үчүн 15 жаңы жумуш орду түзүлөт.
Белгиленгендей, жаңы өндүрүштү үстүбүздөгү жылдын 31-август – Эгемендүүлүк күнүнө карата пайдаланууга берүү пландалууда.
