Бишкек, 29.07.26 /Кабар/. 31-август - Эгемендүүлүк күнүнө карата Баткен облусунда жалпысынан 15 объекттин курулушу аяктап, салтанаттуу түрдө пайдаланууга берилмекчи.
Президенттин Баткен облусундагы өкүлчүлүгүнөн билдиришкендей, анын 12и социалдык объект, 3ү өндүрүш ишканасы.
Алар:
• Баткен шаары – Аэропорт участкасындагы 225 орундуу жаңы мектеп;
• Баткен шаары – муниципалдык автобекет;
• Сүлүктү шаарынын Белес участкасында – "Белес Резорт" эс алуу комплекси;
• Кызыл-Кыя шаарынын Караван айылында – жалпы дарыгерлер практика борборунун терапия бөлүмүнө кошумча имарат;
• Кызыл-Кыя шаарынын Кара-Козу участкасында – үй-бүлөлүк дарыгерлер тобу үчүн жаңы имарат;
• Баткен районунун Жаңы-Жер айылында – 500 орундуу жаңы мектеп;
• Баткен районунун Суу-Башы айылындагы Жаңы-Достук участкасында – фельдшердик-акушердик пункт (ФАП);
• Самаркандек айыл аймагынын Самаркандек айылында – "Бала Нур" бала бакчасына кошумча корпус;
• Кадамжай районунун Айырбаз айылында – "Кыргызстандын 10 жылдыгы» атындагы 500 орундуу мектеп;
• Кадамжай шаарында – «Аленушка» бала бакчасы;
• Кадамжай шаарында – бардык мезгилде иштей турган муниципалдык жабык сүзүү бассейни;
• Раззаков шаарынын Тайлан айылында – «Ак-Шоола» бала бакчасынын жаңы корпусу.
Мындан тышкары, Эгемендүүлүк күнүнө карата облус аймагында 3 жаңы өндүрүш ишканасы ишке берилет.
Алар:
• Баткен районунун Ак-Татыр айыл аймагында – мөмө-жемиштерди кайра иштетүүчү (кургатуу) цехи;
• Кызыл-Кыя шаарында – «Асыл Холдинг» ЖЧКсынын кургак курулуш аралашмаларын өндүрүүчү өнөр жай ишканасы;
• Кадамжай районунун Исхак-Полотхан айыл аймагындагы Гүлдүрөмө айылында – шагыл майдалоочу өндүрүш цехи.
Жаңы пайдаланууга берилүүчү объектилер калкка көрсөтүлүүчү кызматтардын сапатын жогорулатууга, заманбап билим берүү жана саламаттык сактоо шарттарын түзүүгө, туризмди өнүктүрүүгө, жаңы жумуш орундарын ачууга багытталган.
