Бишкек, 04.11.26. /Кабар/. Министрлер кабинетинин төрагасынын биринчи орун басары Данияр Амангелдиев Евразия экономикалык комиссиясынын (ЕЭК) кеңешинин кезектеги жыйынына катышты.
Жыйындын күн тартибине евразиялык экономикалык интеграциянын негизги багыттары боюнча 41 маселе киргизилген, алардын ичинде соода саясаты, өнөр жай кызматташуусу, энергетика, техникалык жөнгө салуу жана Евразия экономикалык бирлигине (ЕАЭБ) мүчө мамлекеттердин өз ара аракеттенүүсүнүн башка чөйрөлөрү камтылган.
ЕЭК кеңешинин мүчөлөрү Жогорку Евразия экономикалык кеңештин "2027-жылга Евразия экономикалык бирлигинин эл аралык ишмердигинин негизги багыттары жөнүндө" чечиминин долбоорун жактырышты. Документ ЕАЭБдин 2027-жылга эл аралык ишмердигинин негизги багыттарын жана артыкчылыктарын, ошондой эле аларды ишке ашыруунун механизмдерин жана куралдарын аныктайт.
Мындан тышкары, кеңеш Евразия өкмөттөр аралык кеңештин "Евразия экономикалык бирлигинин санариптик күн тартибин ишке ашыруу максатында санариптик долбоорлорду кароо тартибин бекитүү жөнүндө" чечиминин долбоорун жактырды. Тартип ЕАЭБдин алкагында санариптик демилгелерди ачык-айкын жана натыйжалуу кароону жана санариптик долбоорлорду ишке ашырууну камсыз кылууга, анын ичинде жасалма интеллект жана маалыматтык технологиялар чөйрөсүндө, биримдиктин интеграцияланган маалыматтык системасын колдонуу менен багытталган.
Ошондой эле ЕАЭБге мүчө мамлекеттер тарабынан өзүнчө жөнгө салуу чаралары колдонулуучу, Евразия экономикалык бирлигинин бажы аймагынан ташылып чыгуучу товарлардын келип чыгышын аныктоо эрежелери (Атайын эрежелер) бекитилди. Бул документти кабыл алуу товарлардын келип чыгышын көзөмөлдөөнү камсыз кылууга жана ЕАЭБге мүчө мамлекеттердин өндүрүүчүлөрүнүн кызыкчылыктарын коргоого багытталган.
Евразия экономикалык биримдиги менен Пакистан ортосунда Эркин соода жөнүндө макулдашуу түзүүнүн максатка ылайыктуулугун изилдөө боюнча изилдөө тобунун ишинин жыйынтыктары жактырылды.
Мындай макулдашууну түзүү Пакистан рыногунда бир катар айыл чарба товарлары, металлургия, көмүр, целлюлоза-кагаз жана химия өнөр жайынын продукциясы үчүн туруктуу атаандаштык артыкчылыктарды түзүшү мүмкүн. Ошол эле учурда ал товар агымдарын диверсификациялоого жана Пакистандан жаңы мөмө-жемиштердин, жашылчалардын, даяр тамак-аш продукцияларынын жана өнөр жай товарларынын айрым категорияларынын экспортун кеңейтүүгө өбөлгө түзөт.
ЕЭК кеңешинин жыйынынын жыйынтыгы боюнча каралган маселелер боюнча тиешелүү чечимдер кабыл алынды.
