Бишкек, 22.01.26. /Кабар/. Кыргызстандын хоккей боюнча жаштар курама командасы катары менен үчүнчү жолу жеңишке жетти.
Дене тарбия жана спорт мамлекеттик агенттигинен билдиришкендей, 21-январда турнирдин үчүнчү айлампасында Кыргызстандын курама командасы Ирандын курамасын 15:1 эсебинде ири жеңишке жетишти. Биринчи бөлүктө 8:0 эсебинде алдыга чыкты.
Бул беттеште Алихан Али-Аскаров төрт шайба, Умар Эгембердиев менен Егор Лещенко үчтөн шайба киргизүү менен айырмаланды.
Үч айлампанын жыйынтыгында Кыргызстандын жаштар курама командасы 9 упай топтоп, турнирдик жадыбалда ишенимдүү түрдө биринчи орунду ээледи.
Белгиленгендей, бүгүн саат 20:00дө Кыргызстандын курамасы Люксембургдун курама командасына каршы ойнойт.
