Бишкек, 04.06.26. /Кабар/. Бүгүн, 4-июнда Инвестициялар боюнча улуттук агенттиктин башчысынын орун басары Дамирбек Бикулов маалыматтарды иштетүү борборлорун (дата-борборлорду) куруу жана эксплуатациялоо багытында иш алып барган кытайлык компаниянын өкүлдөрү менен жолугушту. Бул тууралуу аталган агенттиктен билдиришти.
Маалыматка ылайык, анда санариптик инфраструктураны өнүктүрүү, заманбап дата-борборлорду түзүү, ошондой эле маалыматтарды сактоо жана иштетүү жаатындагы инвестициялык долбоорлорду Кыргызстандын аймагында ишке ашыруу мүмкүнчүлүктөрү талкууланды.
Компаниянын өкүлдөрү санариптик сервистердин, булут технологияларынын жана жасалма интеллектке негизделген чечимдердин иштешин камсыз кылган маалыматтарды иштетүү борборлорун долбоорлоо, куруу жана башкаруу боюнча тажрыйбасын тааныштырышты.
Дамирбек Бикулов Кыргызстандын заманбап санариптик инфраструктураны өнүктүрүүгө жана өлкөнүн инвестициялык жагымдуулугун жогорулатууга багытталган инвестицияларды жана алдыңкы технологияларды тартууга кызыкдар экенин белгиледи.
Жолугушуунун жыйынтыгында тараптар өз ара аракеттенүүнү улантууга жана кызматташуунун келечектүү багыттарын биргелешип иштеп чыгууга даяр экендиктерин билдиришти.
