Бишкек, 18.02.26. /Кабар/. Былтыр Баткен облусунда айыл чарба продукцияларын кайра иштетүү жана сактоо багытында 5 жаңы ишкана ачылды. Бул тууралуу президенттин Баткен облусундагы өкүлчүлүгүнөн билдиришти.
Маалыматка ылайык, аймактын экспорттук потенциалын жогорулатуу максатында күрүчтү жана өрүктү кайра иштетүүчү бирден ишкана, ошондой эле мөмө-жемиштерди муздатып сактоочу 3 заманбап жай пайдаланууга берилген.
Кайра иштетүү багытындагы долбоорлор:
- Ак-Турпак күрүчү: Дүйнөлүк банк жана АРИСтин колдоосу менен Кадамжай районунун Ак-Турпак айылында күрүчтү кайра иштетүү цехи ачылды. Долбоордун алкагында 18,1 млн сомго заманбап техникалар (комбайн, тракторлор, таңгактоочу жабдуулар) алынып, 5 жаңы жумуш орду түзүлдү.
- Самаркандек өрүгү: Баткен районунун Самаркандек айылында жеке ишкер тарабынан 160 миң доллар инвестиция жумшалып, өрүктү кайра иштетүүчү ишкана ишке кирди. Мында 10 адам туруктуу иш менен камсыз болду.
Муздатып сактоочу жайлар жана логистика:
- Кадамжай районунда: Бирлик айыл аймагында кубаттуулугу 350 тонналык логистикалык борбор курулду. Долбоор Баткен облусун өнүктүрүүгө бөлүнгөн 500 млн сомдун эсебинен каржыланып, жалпы баасы 22 млн сомду түздү.
- Төрт-Гүл айыл аймагында: Республикалык бюджет, жергиликтүү бийлик жана KOICA эл аралык уюмунун (14 млн сом) колдоосу менен 500 тонналык мөмө-жемишти тоңдуруп сактоочу ири цех ачылды. Учурда мында 500 тонна ак өрүк жана башка жемиштер сакталууда.
- Кызыл-Бел айылында: Жеке ишкердин 7 млн сомдук инвестициясы менен 170 тонналык сактоо жайы бүткөрүлүп, сезон учурунда 20га чейин жумушчу иштей баштады.
Бул ишканалардын ачылышы Баткен облусунун айыл чарба продукцияларын сапаттуу иштетүүгө жана аларды кошумча нарк менен чет өлкөлүк базарларга экспорттоого жол ачат.
