Бишкек, 25.02.26. /Кабар/. Президенттин Баткен облусундагы өкүлүнүн биринчи орун басары Бактыбек Токсонбаев 2025-жылы облустук өнүктүрүү фонду тарабынан каржыланган долбоорлордун аткарылышын жеринде көрүп чыкты. Бул тууралуу өкүлчүлүктөн билдиришти.
Маалыматка ылайык, өткөн жылы инфраструктуралык долбоорлорду ишке ашырууга жалпы 25 млн 401 миң 750 сом бөлүнгөн.
Анын алкагында төмөнкү иштер аткарылды:
- Сүлүктү шаардык ооруканасынын жылытуу системасы капиталдык ремонттон өткөрүлдү;
- Кызыл-Кыя жана Баткен шаардык тазалык ишканаларына заманбап көчө тазалоочу унаалар, оор жүк ташуучу КаМАЗ жана эвакуатор-манипулятор сатып алынды;
- Самаркандек айылындагы №34 лицейдин имараты оңдоп-түзөлдү;
- Раззаков шаарынын Ак-Булак жана Алтын-Бешик айылдарындагы ички көчөлөргө асфальт төшөлдү;
- Баткен облустук ӨКМ башкармалыгы үчүн авариялык-куткаруучу унаа жана атайын шаймандар сатып алынды.
Мындан тышкары, аймактагы ишкерликти колдоо максатында төрт ишкерге 5 жылдык мөөнөткө, жылдык 2 пайыздык чен менен жалпы 18 млн сом көлөмүндө жеңилдетилген насыя берилди.
Текшерүүнүн жүрүшүндө Бактыбек Токсонбаев аткарылган иштердин сапатына токтолуп, мындай социалдык-экономикалык долбоорлор 2026-жылы дагы жигердүү улантыларын баса белгиледи.
